![Featured image for سدّ جوعك واتعرف على أجمد مطاعم المنصورة](https://blog.uber-cdn.com/cdn-cgi/image/width=2160,quality=80,onerror=redirect,format=auto/wp-content/uploads/2018/09/EG_4_blog-header_2160x1080px-1024x512.jpg)
مِن المنطقي إن مدينة المنصورة يكون فيها مطاعم جامدة جدًّا، خصوصًا لما نعرف إن فيه عدد كبير من المزارع حواليها، مش بس كده، لا ده إنت لازم تحجز قبل ما تروح بعض المطاعم هناك، خصوصًا في الويك إند! ولو إنت منتظر تلاقي التنوّع أو عدد المطاعم الكبير اللي موجود في القاهرة، ماتتعبش نفسك، مش هتلاقي، وده شيء طبيعي جدًّا ومتوقع من مدينة أصغر بكتير من القاهرة زي مدينة المنصورة! لكن ده مايمنعش إنك هتلاقي هناك مطاعم بتقدّم أشهى الأكلات المصرية في بعض المناطق، زي حي الجامعة، وده حي جنب جامعة المنصورة رغم إن المنطقة دي معظمها مليان بمحلات الأكلات السريعة زي دجاج كنتاكي وبيتزا هت وكوك دوور! تعالوا معانا “نسدّ جوعكم” ونتعرّف مع بعض على أشهر وأجمد المطاعم الموجودة في المنصورة.
أجمد الأكلات المصرية:
مطاعم الصباحي
لو جبنا سيرة أجمد المطاعم في المنصورة، ماينفعش مانتكلّمش عن مطاعم الصباحي للمشويات والمأكولات البحرية، خصوصًا إنه بيقدّم اختيارات كتيرة من الأطباق المصرية وكمان العالمية. وسواء كنت معزوم هناك مع أصحابك في الشغل أو بتحتفل مع أهلك بعيد ميلادك، هيرحّب بيك العمّال جدًّا وهيخلّوك تقضي يوم مايتنسيش!
العنوان: ٣ شارع قناة السويس
تليفون: +20 50 2309942
أحلى الأكلات السورية
أهل الشام
اتنقل ولع وجنون المصريين بالأكل السوري من القاهرة لباقي المدن المصرية، وطبعًا المنصورة واحدة منهم. بتتميّز مأكولات أهل الشام بأطباق الشاورما اللذيذة اللي بتتقدّم مع البطاطس المقلية والسلطة. ورغم إن كرشك احتمال يتمدّد قدامك بعد الأكلة دي، لكننا برضه هننصحك تطلب من عندهم بيتزا شاورما الفراخ!
عناوين الفروع: شارع الترعة – شارع الجلاء – شارع الجيش
تليفون: +20 112 074 0067
أطعم الأكلات العالمية
ستريو
المطعم ده بيقدّم منيو مليانة أكلات أشكال وألوان بداية مِن الشوربات والسلطات، لغاية الباستا والأطباق الآسيوية، وكمان اللحوم والمأكولات البحرية. ورغم إن المنيو اللي بيضمّ أكلات كتيرة كده عادة بيدي انطباع سيئ إن المطعم ده مش متخصّص في حاجة معينة، لكن مطعم ستريو قضى تمامًا على الفكرة دي، وتقريبًا كل الأطباق اللي بيقدّمها متميّزة جدًّا!
العنوان: شارع المشاية السفلية
تليفون: +20 101 091 2525
أجمد حلويات
لابوار
فرع المنصورة من لابوار لا يُعلا عليه؛ وبيقدّم حلويات شرقية وغربية روعة، وكمان مخبوزات وكيك هتاكل صوابعك وراهم.
العنوان: أمام القاعة الماسية في شارع المشاية السفلية
تليفون: +20 50 2368778
ألذ فطار
كافيه أوريجو
هتلاقي كافيه أوريجو قدام القرية الأولمبية وجنب مول الجامعة بلازا. وباعتباره فرع من فروع سلسلة كافيهات ألمانية مشهورة جدًّا، فبيقدّم أجمد قهوة إسبرسو مع بن ألماني معتبر، وعنده كمان قهوة تركي وساندوتشات حكاية، ده غير الوافل والكيك اللي بيقدّمهم.
العنوان: حي الجامعة جنب مول الجامعة بلازا
أحلى غذاء
ستيك آوت
المطعم ده اتأسّس على إيد شيف أمريكي سنة ١٩٥٩، وبيتميّز بأكله الطازة وبجودته العالية. وعنده حوالي ٧ فروع في مصر. أما عن فرع المنصورة، فهتلاقيه قدام جامعة المنصورة، وبيقدّم أطباق غربية متنوّعة منها اللحوم بصوصها الروعة، ده غير البرجر والباستا والمأكولات البحرية. لكن، نصيحة خاصة، سيب مكان في بطنك للحلويات، خصوصًا التشيز كيك بتاعتهم!
العنوان: شارع الجمهورية
تليفون: +20 101 063 6080
www.steakout-eg.com/mansoura.html
أجمد عشاء
أوريجانو
ده مطعم إيطالي أصيل بيقدّم أطباق باستا شهية جدًّا، وكمان البيتزا عندهم لازم تتجرّب. المطعم ده مناسب كمان للعائلات وفي ركن خاص لألعاب الأطفال.
العنوان: شارع سعد زغلول توريل الجديدة
أشهى الأكلات السريعة
بافلو برجر
بخلاف البيف برجر اللي هتلاقيه عندهم بأشكال مختلفة، بيتميّز المطعم ده إن ليه فروع في مُدُن و مناطق كتيرة في مصر، وكمان عندهم برجر فراخ مالوش حل. ماتنساش تطلب هناك ساندوتش هاواي وايكيكي مع حلقات الأناناس والجبنة الشيدر، صدّقني مش هتندم أبدًا!
العنوان: شارع الجمهورية
أجمد أكلات بحرية
إستاكوزا
مطعم إستاكوزا بدون مبالغة هو أجمد مطعم مأكولات بحرية في المنصورة. وجمال السمك والسي فود بتاع المطعم ده هيخليك مشغول لشوشتك وإنت بتاكل، وهتنسى تتصوّر مع الأكل وتنشر الصور دي على “إنستجرام”!
العنوان: شارع قناة السويس
تليفون: +20 102 221 6816
تم النشر بواسطة Uber Editor