دايمًا بيكون عيد الأضحى أو العيد الكبير مناسبة خاصة جدًّا للكبير قبل الصغير للاحتفال، ودي فرصة بيتجمع فيها الأهل والأصحاب مش بس في مصر، لكن في جميع الدول الإسلامية والعربية كمان. ويمكن اللي بيميّز العيد الجميل ده عن عيد الفطر هو دبح الأضحية وتوزيع اللحم على الأهل والفقراء وكمان لمّة العيلة، علشان كده “أوبر” حريصة على إنها تقدّم لكم “عيديتها” في صورة دليل شامل للاحتفال بالعيد في القاهرة، وكل سنة وإنتم طيبين.
صعب جدًّا الاحتفال بالعيد الكبير من غير طاجن الفتة بالموزة الشهيّة، ودي الأكلة اللي معظم المصريين بيحرصوا إنهم يعملوها في أوّل أيام عيد الأضحى، وهي عبارة عن فتة لحمة ضاني بالأرز مع الصلصة والخل والتوم. وبعد كده، “كورس” اللحمة مابينتهيش على مدار أيام العيد الباقية؛ على الفطار هتلاقي أجمل كبدة مشوية، وفي وقت الغدا أحلى رقاق باللحمة أو ضلوع الضاني المشوية اللي تاكل صوابعك وراها!
ولمّا تزهق من الأكل، وده صعب أوي على فكرة، ييجي وقت الفُسح والخروجات، ولو بتخطط تزور أي مكان سياحي في القاهرة في أول أيام العيد، لازم تاخد بالك إن معظمها بيكون مقفول، وفي الأيام الباقية من العيد بتفتح لعدد ساعات أقل من المعتاد، علشان كده معظم المتعة كلها هتلاقيها في الشوارع اللي مليانة بالأطفال وكمان الكبار اللي لابسين ملابس جديدة بتعبّر عن فرحتهم بالعيد.
في بعض الأماكن، هتلاقي فنانين ومغنيين بيأدّوا فقرات استعراضية في الشوارع، وكمان هتلاقي ساحات ألعاب متنقّلة ومسارح للعرائس وعروض السحر المختلفة اللي بتجمّع حواليها الأطفال اللي بيكونوا مبهورين باللي بيحصل، غير الشوارع اللي بتكون مليانة بالزينة والبالونات والفوانيس وكل أشكال الإضاءة الحلوة!
ومِن ضمن أشهر الأماكن اللي هتلاقيها مليانة عن آخرها بالمصريين اللي بيحتفلوا بالعيد، ماينفعش مانذكرش جامع مصطفى محمود في المهندسين؛ دايمًا الميدان اللي فيه الجامع ده مليان بالليل بالعائلات والأصحاب والبيّاعين اللي بيحاولوا يبيعوا أي حاجة بداية مِن البالونات وحتى “غزل البنات”. وبيحرص الشباب على إنهم يولّعوا ألعاب نارية أو يرقصوا بحيوية على أنغام أحدث الأغاني على طريقتهم الخاصة.
وفي أوقات العيد كمان بتكون الحدائق العامة زي حديقة الأزهر زحمة جدًّا، خصوصًا بالمصريين اللي حابّين يستمتعوا بطلّة الحديقة الساحرة فوق القاهرة، وهناك كمان حديقة الحيوانات وأهرامات الجيزة، ودول مكانين بيحرص المصريين على زيارتهما بأعداد كبيرة في إجازة العيد.
ومِن الأمور المعتادة في العيد كمان، إنك تشوف الجميع لابس ملابس جديدة وبياخد صور سيلفي أو صور مع العائلة قدام الأماكن اللي ذكرناها دي، أو قدّام الأنوار اللي بتزيّن المساجد والمباني العامة التانية. أمّا عن الأماكن النيلية، فهي دايمًا بتجمّع آلاف المصريين في أوقات الأعياد، وبعضهم بياخد صور روعة عند النيل اللي بيكون خلفية تُحفة لصورهم. والرحلات النيلية كمان مُتعة حقيقية، سواء اللي كانت على سطح “الفلوكة” أو المراكب النيلية الكبيرة، ده غير كمان المطاعم العائمة على النيل والملاهي الليلية الكتيرة في المنطقة دي.
ولو بتدوّر على مكان فخم تقضي فيه إجازة العيد، هتلاقي الفنادق الكبيرة اللي بتطلّ على نهر النيل مليانة بمطاعم مميّزة جدًّا بتقدّم بوفيه مفتوح فيه كل ما لذّ وطاب مِن أشهى المأكولات. دور السينما كمان بتعيّد على طريقتها، وبتعرض أحدث الأفلام العربية تحديدًا علشان تجذب أكبر عدد من الجمهور اللي عادة بيكون محتار يقضّي إجازة العيد فين!
عيد أضحى مبارك عليكم جميعًا!
ملحوظة: أول أيام عيد الأضحى بإذن الله هيبدأ يوم التلات ٢١ أغسطس وهينتهي يوم الجمعة 24 أغسطس ٢٠١٨!
وممكن تعرف أحدث الأفلام اللي هتتعرض في العيد من هنا
وهتلاقي كمان كل حاجة عايز تعرفها عن العيد من اللينكات دي:
موقع El Fasla
تم النشر بواسطة Uber Editor
