إزاي تكون راكب متميز وتحسّن تقييمك في أوبر

كنت تعرف أن الراكب ليه تقييم في أوبر زي الشريك السائق؟ عشان تعرف تقييمك، افتح تطبيق أوبر واضغط على رمز القائمة الموجود فوق على اليمين وبص على الرقم اللي تحت اسمك، هو ده تقييمك في أوبر. التقييم بيتحسب كمتوسط لكل التقييمات اللي خدتها من الشركاء السائقين بشكل مجهول وبيكون على مقياس من واحد لخمس نجوم.

لو لقيت تقييمك منخفض، ماتقلقش! فيه حاجات كتير ممكن تعملها عشان ترفع تقييمك في أوبر، وعملنالك قائمة بغلطات الركاب المتكررة عشان تعرف إيه اللي تتجنبه.

محدش بيحب يفضل مستني كتير وده بينطبق كمان على الشركاء السائقين في أوبر خصوصاً لما الانتظار ده بيعطلهم عن مقابلة ركاب تانيين. اتأكد إنك جاهز للخروج وكل حاجتك معاك قبل ما تطلب مشوارك عشان تضمن إنك ماتضيعش أي وقت أو تخسر أي نقط.

شركائنا السائقين عايزين يطمنوا على راحتك وسلامتك، لكن لازم أنت كمان تعمل اللي عليك. دايماً البس حزام الأمان وماتحاولش تاخد معاك ركاب كتير في العربية. ولو معاك عدد كبير، تقدر تطلب عربية أكبر.

لو ماروحتش المكان المحدد اللي هتقابل فيه الشريك السائق أو روحت المكان الغلط، فأنت كده بتخاطر بتقييمك على مقياس أوبر وممكن تاخد نجوم قليلة. دايماً اتأكد أكتر من مرة من الموقع اللي هتقابل فيه الشريك السائق قبل طلب المشوار وخصوصاً لو كنت بتعتمد على نظام تحديد المواقع (GPS).

مفيش أجمل من العربية النضيفة اللي ريحتها منعشة وتخليك تبتسم في سعادة. أكيد الركاب والشركاء السائقين بيحبوا العربية النضيفة المرتبة، عشان كده من اللطيف إنك تحاول تقلل تماماً من أي فوضى. استمتع بمشوار مريح مش هيضطر حد ينضف بعده. ومين عارف، يمكن كمان تاخد تقييم الخمس نجوم اللي تستحقه.

التعامل اللطيف والسلوك الإيجابي بيسيبوا أثر كبير. عشان كده، حاول تخلي وجودك في كل مشوار مع أوبر يكون مصدر للبهجة والطاقة الإيجابية. يعني مثلاً “إزيك؟ عامل إيه؟” وابتسامة هيخلوا المشوار أحسن للكل وكمان ممكن بسبب اللباقة دي توصل للتقييم المثالي.

لأن تقييمك في أوبر بيكون عن طريق حساب متوسط تقييمات كل مشاويرك، فممكن تغييره ياخد شوية وقت. لكن لو مشيت على نصايحنا هتقدر بسرعة توصل لهدفك وتاخد أعلى تقييم في أوبر.