شوف القاهرة بعيون “أهل كايرو”!
طول عُمر “أوبر” بتحب القاهرة علشان كده سألنا أهلها عن إيه أحسن الأماكن اللي ممكن زيارتها أو أحسن الحاجات اللي ممكن تتعمل في المدينة اللي مبتنمش أبدًا! وطبعًا، كانت الاقتراحات اللي قالوها لنا “أهل كايرو” كتيرة جدًّا، أهمها ليه علاقة بالأكلات والمساجد وكمان الحدائق والأهرامات. تعالوا معانا نتعرَّف على أهمّ وأحسن الأماكن في القاهرة:
حديقة الأزهر (مصطفى)
“مع الأسف صعب نلاقي مساحات خضراء كتيرة في القاهرة؛ علشان كده بتعتبر الحدائق والممرات المائية الصناعية في حديقة الأزهر واحة طبيعية لأي زائر فيها. وأهمّ اللي بيميز الحديقة دي إن تكلفة دخولها بسيطة وكمان مفتوحة ٢٤ ساعة، وبتطلّ على قلب القاهرة القديمة بمبانيها وجوامعها العتيقة، خصوصًا جامع محمد علي. أنا شخصيًّا بحب أروح وأقعد في أي مطعم أو كافيه وآكل هناك وأنا شايف منظر غروب الشمس البديع قدامي.”
أهرام الجيزة (كاميليا)
“لحسن الحظ، أهرامات الجيزة مش بعيدة عن القاهرة، ولو كُنت سائح أو زائر بتزور القاهرة لأول مرة، صعب جدًّا، إن مكانش مستحيل، إنك تفوّت زيارة الأهرام اللي بتعتبر واحدة مِن عجائب الدنيا السبع القليلة اللي لسه موجودة لغاية دلوقتي! أنا لسه فاكرة أوّل مرة مشيت فيها بين ممرات هرم خوفو (الهرم الأكبر). وبمجرّد ما تخرج مِن ممرات الهرم الأكبر الضلمة، هتنضم لملايين الزوّار التانيين عبر التاريخ اللي وقفوا في خشوع وذهول وكمان تأمّل أمام عظمة تمثال أبوالهول!”
المتحف المصري الكبير (نور)
“ممكن يكون القناع الذهبي للملك توت عنخ آمون أشهر قطعة أثرية في العالم كله. لكن، لغاية دلوقتي، متعرضش غير كمية قليلة جدًّا من الآثار في المتحف المصري القديم القريب من ميدان التحرير. كل ده هيتغيَّر مع افتتاح المتحف المصري الكبير السنة دي، خصوصًا مع موقعه المميّز الجديد اللي بيطلّ على أهرام الجيزة وتكلفته الباهظة وكمان عَرض حوالي ٥٠.٠٠٠ قطعة أثرية مهمة فيه.”
قلعة صلاح الدين الأيوبي (رشيدة)
“القلعة ده بتعود جذورها إلى أكتر من ١٠٠٠ سنة، ومع ذلك، لسه جدرانها المرتفعة بتهيمن على منطقة القاهرة التاريخية القديمة، علشان كده بتعتبر موقع تُحفة للتصوير. وبتحتضن القلعة الضخمة دي ٣ جوامع (متنسوش جامع محمد علي) و٣ متاحف مهمّة، وكمان مع قرار مَنع العربيات مِن الدخول للقلعة، ممكن نقول بضمير مرتاح إن القلعة بقت مكان هادي جدًّا يَصلح للهروب من زحمة المدينة وصخبها المزعج!”
جامع السلطان حسن (عمر)
“االجامع ده واحد مِن الجوامع الأثرية الشهيرة في القاهرة، وبيعتبر دُرة العمارة الإسلامية في الشرق، خصوصًا مع موقعه الفريد بميدان صلاح الدين تحت القلعة مباشرة، ومئذنته المرتفعة جدًّا اللي بتعتبر أطول مئذنة في القاهرة، وواحدة من أطول المآذن في العالم. وأهم حاجة بتميّز الجامع ده تصميمه المعماري الجميل وزخرفة كتاباته الإسلامية البديعة، ووجود ساحة كبيرة مخصّصة للوضوء فيه، وفي كل ركن من أركان المسجد مدرسة مخصّصة لتعليم مذهب مِن مذاهب الفقه الأربعة.”
جامع الأزهر (هبة)
“جامع الأزهر مِن أقدم الجوامع في القاهرة وأشهر المساجد في العالم الإسلامي، وجانبه كمان واحدة من أقدم الجامعات في العالم: جامعة الأزهر. وتُعتبر جامعة الأزهر رمزًا من الرموز الإسلامية في مصر وبيُدرّس فيها المذهب السّني والشريعة الإسلامية مع علوم الهندسة والطب لأكتر من ٩٠.٠٠٠ طالب وطالبة. وللجامع العريق اللي أسّسه جوهر الصقلي بأمر مِن المعز لدين الله أوّل الخلفاء الفاطميين في مصر، ٥ مآذن وساحة واسعة جدًّا للصلاة، وهو شاهد كمان على تاريخ العمارة الإسلامية وتطوّرها في القرون الماضية.”
خان الخليلي (صوفيا)
“ممكن نقول إن خان الخليلي هو أهمّ حي مِن أحياء مصر القديمة، وموقعه ساحر جدًا قدام جامع الأزهر وبجانب جامع سيدنا الحسين. والحي ده مليان بازارات ومحلات ومطاعم شعبية، وبيتهافت عليه السوّاح لشراء التّحف والأعمال اليدوية والعطور والبخور مِن المحلات الكتيرة المتكدّسة جنب بعضها في حواري ضيقة. الحي ده أفضل مكان لشراء الهدايا أو الملابس المزركشة المصنوعة مِن القطن المصري أو حتى المشغولات الذهبية والفضية. وعلشان تتمتع بتجربة تتحفر في الذاكرة وتستمتع بالحياة الليلية في القاهرة، اقعد على أي قهوة من القهاوي الصغيرة جدًّا في خان الخليلي واللي بتطلّ على شارع الموسكي، واستمتع بالفرجة على اللي رايح واللي جاي والبياعين والسوّاح.”
مصر القديمة- القاهرة القبطية (نور)
“بتتواجد القاهرة القبطية في حي مصر القديمة، وبتضمّ كنائس قديمة ومقابر مسيحية مهمة. وبتعود جذور المنطقة ده للحكم الروماني لمصر. ومِن أشهر الكنائس في المنطقة دي اللي بتتميّز بممراتها الضيقة الكنيسة المعلّقة، واتسمّت الكنيسة بالاسم ده لأنها اتبنت على برجين مِن الأبراج القديمة للحصن الروماني (حصن بابليون) اللي بناه الإمبراطور تراجان في القرن الثاني الميلادي. وبمرورك على الكنائس دي، هتقدر بسهولة تتذوّق الجمال المعماري القبطي القد يم وكمان زيارة المتحف القبطي. وفي منطقة مُجمّع الأديان في حي مصر القديمة هتقدر كمان تزور كنيسة أبوسرجة الأثرية الشهيرة.”
منطقة الجزيرة (ليلى)
“منطقة الجزيرة أو جزيرة الزمالك بتقع على نهر النيل وسط القاهرة، وبتطلّ على برج القاهرة الشهير وكمان حي الزمالك العريق. المنطقة دي مليانة بقصور شاهِدة على الزَمن الجميل، ومحلات عصرية ومعارض راقية ومطاعم فخمة جدًّا. أنا على المستوى الشخصي، باستمتع بمعارض الفنون الحديثة المختلفة في المنطقة ده وبعتبرها فسحة حلوة قوي وفرصة للاستمتاع بالحياة الليلية في القاهرة، وممكن بسهولة تتفرج على كل المعالم دي مِن قمّة البرج.”
كشري أبوطارق (إسلام)
“كتير مِن المصريين هيقولوا إن أحسن حاجة في القاهرة هي أكلها الشهي، علشان كده لو هتزور القاهرة، لازم كمان تجرّب أكلة الكشري اللذيذة مِن مطعم مشهور. ومع أن مطعم كشري أبوطارق بيقدّم طبق واحد فقط عبارة عن خليط من الرز والمكرونة والعدس فوقيهم الدقّة وصوص الطماطم الحرّاق والبصل والحمص، فالطبق ده شهرته كبيرة جدًّا لدرجة إن المطعم مكوّن من ٥ أدوار ودايمًا زحمة! ماتنساش تأكل الطبق اللذيذ ده بصلصته الحارة، وهتدعيلي أكيد!”
تم النشر بواسطة Uber Editor
