由今日開始，Uber香港將會正式推出全新功能－即時定價。你只需要好似平時咁輸入你嘅上車同落車地點，我地就會為你即時提供是次行程嘅實際車資，一目了然。
即時定價功能利用預計行程嘅行車時間同距離，及叫車時嘅供求及交通狀況來計算車資。如果因為需求增加而出現車資加乘，你見到嘅即時定價會包括加乘嘅部分，咁你就可以喺叫車前更清楚知道實際車資，唔駛再左計右計啦！就算你要去幾個目的地，或者途中要更改行程都唔緊要，因為系統會自動轉用傳統行車時間同距離嘅方法計算車資。
銀行授權
就好似酒店向客人收費嘅方式，Uber會喺你每次叫車時向你嘅銀行要求授權即時定價嘅金額。 部分銀行可能會於閣下行程開始之前向你發出一個交易通知短訊。請注意，有關通知只代表暫時性的銀行授權，我們並不會在你嘅行程完結之前收費。如你取消行程或當實際車資同即時定價出現不同，該授權將從你嘅帳戶中取消，但銀行可能需要一啲時間去處理。如果你對帳單上某項交易有任何疑問，請直接與有關銀行聯絡。
常見問題
問：如果我喺行程中更改目的地、有多個目的地、或者想中途上落客會點？
答：如果你對行程作出重大改變，咁即時定價可能不適用。喺呢啲情況下，我們將會用返現時傳統的行車時間同距離嘅方法計算車資。如果車資喺行程當中有任何更改，我哋會即時通知你。
問：即使我唔更改目的地，我嘅即時定價有冇機會變更？
答：即時定價係基於你上車同落車地點之間嘅預計交通狀況而計算。但由於香港嘅交通情況有時好難預測，所以系統會因應情況而用返現時嘅車資計算方法。
問：點解加乘標誌唔再出現喺即時定價嘅介面？
答：新功能已經將加乘嘅部分計算在即時定價內，唔會再分開顯示。例如，以往你會見到加乘係1.5倍，而家就會直接見到車費係$80，咁就更方便你喺叫車前清楚知道實際車資。
問：即時定價係唔係包括加乘費用？
答：係。如果當時叫車需求增加，系統會自動將車資加乘。直接顯示嘅價錢令你可以更容易比較各種車型嘅收費。要注意嘅係，你需要接受咗即時定價先可以叫車。
問：即時定價係唔係包晒所有費用（例如隧道費等）？
答：一般係。但喺某啲情況下，最終車資可能會低於即時定價（例如當你用咗優惠碼）或更高（例如當你改變行程嘅目的地）。
銀行授權常見問題
問：點解我會喺行程開始前收到銀行嘅交易通知？
答：當你叫車時我哋會向銀行要求授權，部分銀行或會即時以短訊通知有關交易。無須擔心，該授權只會喺行程完結時轉為實際收費；或當你取消行程時，原先授權會作廢。
問：如果我一日內搭多過一程車，會唔會收到多次銀行授權？
答：視乎情況。如果上一程車嘅銀行授權未完成或未被取消，同一授權可以喺下一程繼續使用。但如授權已經處理，咁你就可能會收到多次銀行授權嘅通知。
問：點解銀行授權嘅金額會高於實際車資？
答：銀行授權嘅金額取決於即時定價，但並不包括任何優惠或推廣計算，所以授權金額可能會高於你實際需要支付嘅車資。請放心，我哋最終只會收取實際車資，剩餘嘅授權金額將根據你嘅付款方式退還。
問：我可以點分銀行授權同實際收費？
答：喺你嘅帳單上面，銀行授權項目會顯示為「處理中」或「無效」而唔係「已完成」。如果你對銀行授權有更多疑問，我哋建議你直接聯絡銀行。
問：點解系統會要求我新增另一個付款方法？
答：呢個情況可能會喺銀行授權唔成功嘅時候發生。當我哋無法獲得銀行授權即時定價嘅金額，我哋會拒絕你嘅行程。我哋建議你新增另一個付款方法或直接聯絡你嘅銀行跟進。
問：如果我喺行程開始前取消，會唔會被收取車資？
答：唔會。如果你遵從我哋嘅取消政策下取消行程，銀行授權會被即時取消，但銀行可能需要一啲時間去處理。
問：點解同一個行程會分開兩次收費？
答：當你改變行程嘅目的地而導致最終車資高於銀行授權嘅金額，而我哋未能再次授權最終車資，有關行程將有機會被分開兩次收費。如果你喺銀行授權方面需要任何協助，請透過help.uber.com聯絡我哋。
發佈者：Treesa Amy Leung
