“علا حمدي صالح” ست جدعة مِن مواليد الفيوم، وساكنة في منطقة فيصل في محافظة الجيزة. ومِن ساعة ما ابتدت تسوق مع أوبر مِن أكتر من سنة، وهي بتشتغل ١٢ ساعة يوميًّا، ٧ أيام في الأسبوع. الشغل هو كل حياتها وبتقابل ناس كتير، ومارفضتش أبدًا أي أوردر ليها وبتروح أي مكان في القاهرة، علشان كده في المقابلة اللي عملناها معاها بتحكي لنا أكتر عن أحسن الأماكن اللي بتحبّها في القاهرة واللي يمكن مصريين كتير مايعرفوهاش ولا حتى سمعوا عنها.
قولي لنا أكتر عن نفسك؟
أنا عندي ٥١ سنة، اتولدت في الفيوم، سنجل مش متجوّزة، وبقالي سنة وشوية شغالة سائق أوبر. عمري ما رفضت أوردر وباروح أي حتة؛ مِن فيصل للشروق للتجمع؛ أي مكان بروحه. وباشتغل على عربيات مش بتاعتي، أقل حاجة ١٢ ساعة في اليوم، وتقريبًا ٧ أيام في الأسبوع من غير ولا يوم أجازة. باختصار، الشغل هو كل حياتي!
كنتي شغالة إيه قبل أوبر؟
كنت باشتغل مدرّبة سواقة مع مكاتب تعليم سواقة، ولمّا عرفت عن أوبر قررت اشتغل معاهم، تحديدًا من شهر ٨ أو ٩ في سنة ٢٠١٧.
ليه أوبر تحديدًا؟
عملائها محترمين جدًّا، والشركة نفسها عندها مصداقية عالية، وأنا شرف ليّ إني اتعاملت مع أوبر، علشان همّ الأكثر احترامًا سواء كانوا عملاء أو كباتن. وكمان باكون حرّة في أوقات الشغل بتاعتي، وأنا اللي باحدّده، علشان كده ارتحت في التعامل معاهم.
إيه أحسن مطعم في القاهرة؟
“صبحي كابر” مافيش كلام. أكله نضيف وجميل جدًّا، والناس هناك في “صبحي كابر” بقوا عارفني وبيندهوا لي بـ”مدام علا بتاعة أوبر”، وأقدر أقول بكل ثقة إن الخليجي أو الأجنبي اللي زار مصر ومارحش “صبحي كابر” يبقى لسه ماجاش أو عدّى عليها!
إيه هو أجمل مكان في القاهرة بالنسبة ليكي؟
الحسين والسيدة زينب مِن الأماكن اللي بارتاح لها جدًّا. الأماكن دي بتتكلم عن بلدنا وبتعكس شخصيتنا كمصريين، خصوصًا الآثار الإسلامية اللي فيها والبيوت القديمة. ويكفينا فخرًا إن عندنا أماكن أثرية زي دي.
إيه أحسن مكان ممكن يوفّر منظر تحفة وإطلالة ساحرة في القاهرة؟
كورنيش النيل وكوبري قصر النيل. لمّا باكون هناك باكون مبهورة بمنظر المراكب والأضواء اللي بتنعكس في الميه؛ ولو أجّرت مركب وأخدت جولة في النيل، هتنسى نفسك وزحمة القاهرة وخنقتها! الجو كمان جميل هناك، خصوصًا بالليل.
إيه المكان اللي ناس كتير ماتعرفوش وهيفوتهم كتير لو ماعدّوش عليه؟
وكالة السحيمي في الجمالية. المكان ده ناس كتير ماتعرفوش؛ مكان لذيذ جدًّا فيه مغنى شرقي وخليجي وجو جميل. وفيه ركن مخصوص للقعدات العربية، ولو حبّيت تحتفل بعيد ميلادك هناك، هتلاقي كل الناس بيحتفلوا بيه معاك. ولو خارج مع خطيبتك أو مراتك، هتلاقي قعدة رومانسية جميلة. المكان ده روعة بجد.
بتلاقي أي فرق في المعاملة مِن الركّاب علشان إنتي ست؟
إطلاقًا. بالعكس، دول بيحترموا الست أكتر؛ في نظرهم دي واحدة بتاكل عيش، فبيحترموها أكتر.
تم النشر بواسطة Uber Editor