How the Uber rating system works

بعد كل رحلة، هيطلب تطبيق أوبر مِن الشركاء السائقين وكمان الركّاب تقييم تجربتهم في الرحلة دي، وطبعًا دي حاجة مهمة بتتبعها خدمة عملاء أوبر سواء مع الركّاب أو الشركاء السائقين!

نظام التقييم بيتراوح بين نجمة واحدة وخمس نجوم، وممكن بسهولة تعرف متوسّط التقييمات اللي أخدتها على تطبيق أوبر، وده من خلال رمز النجمة والرقم اللي جنبه على طول تحت اسمك.

الغرض من نظام التقييم ده إن أوبر ترفع من مستوى الخدمة ومعدلات السلامة والأمان.

والحاجة المهمة في نظام التقييم ده إنه سواء كنت راكب أو سائق، مش هتعرف التقييم اللي أخدته من الطرف التاني.

وافتكر كويس الكلمات دي: مش هتقدر تشتري تقييم كويس ليك، لكن تقدر تاخد تقييم عالي لو اشتغلت على نفسك واتّبعت النصايح اللي هنقولها لك دي!

لو كنت راكب:

بمجرّد ما السائق بيقبل طلب الرحلة، بيروح مباشرة علشان ياخدك من المكان اللي حدّدته. وطبعًا في مُدُن زحمة زي القاهرة والإسكندرية، تغيير الاتجاه على آخر لحظة بيكون أمر صعب ومزعج. ومع إننا مابنتحكّمش في الظروف اللي بتواجهنا، عليك إنك تحاول تتأكّد إنك عايز الرحلة دي قبل ما تحجزها على قدّ ما تقدر.

حاول تكون في مكانك اللي حدّدته على تطبيق أوبر وماتتحرّكش منه لغاية ما يوصل السائق. وهتقدر بكل سهولة تتابع مسار عربية أوبر لحظة بلحظة من خلال التطبيق، ولو قدرت تعمل كده إنت والسائق مش هتضيّعوا وقتكم في إنكم تلاقوا بعض.

رغم إن ماحدش هيلومك لو فضلت ساكت طول الرحلة، هيبقى كويس لو فتحت حوار مع السائق بكل أدب. ماتنساش إن السائقين بيلفّوا بعربياتهم على الطريق طول اليوم ولساعات طويلة، علشان كده اتكلّم معاهم، يا عالم ممكن يفيدوك إزاي أو ينصحوك بأماكن تحفة عمرك ما سمعت عنها.

ساعات بتغلب علينا الأنانية ومابنفكّرش إلا في نفسنا، وده شيء سيئ جدًّا، علشان كده حاول تحطّ نفسك مكان السائق والناس اللي هتركب بعديك، وماتحاولش مثلًا ترمي زبالة في العربية، وخدها معاك وإنت نازل، وحاول كمان ماتاكلش في العربية علشان ماتسيبش ريحة وحشة فيها. والأهم من ده وده، مِن فضلك ماتشربش سجاير نهائيًّا في العربية!

زي ما قلنا قبل كده، عملية التقييم متبادلة بينك وبين السائق، علشان كده لو مش بتدي تقييم لأي سائق بنسبة كبيرة تقييمك إنت اللي هيقل تدريجيًّا!

لو كنت شريك سائق

حاول تحافظ على نظافة نفسك وعربيتك على قدّ ما تقدر. و بنفسك وبعربيتك من هنا (رابط لموضوع تاني عملناه الشهر ده)

حاول ماتتّصلش بالركاب كتير خصوصًا لو ماتأخروش عليك أو عرفت توصلهم بسهولة.

حاول دايمًا تسأل الركّاب عن أحسن طريق يحبوا يمشوا منه؛ علشان هتلاقي ركّاب بياخدوا طريق معين كل يوم، وممكن تعرف منهم معلومات ماكنتش تعرفها قبل كده. واسأل دايمًا الركّاب عن الطريق اللي يحبّوا يمشوا منه قبل ما تبدأ الرحلة!

فكّر كويس في الحاجات اللي ممكن يحتاجها الركّاب، وحطّ نفسك مكانهم؛ فلو مثلًا الجو حرّ، حاول تشيل معاك في العربية أزايز مياه ساقعة أو حاول يكون معاك شواحن لتليفونات محمولة مختلفة.

ساعات كتير الإلحاح بيجيب نتيجة عكسية؛ علشان كده حاول ماتضغطش على الركّاب وتلحّ في إنهم يدّوك تقييم. خليك متأكّد تمامًا إنك لو عملت اللي عليك وهمّا اتبسطوا مِن الرحلة عمومًا، هيقيّموك وهيدوك نجوم عالية كمان!