إزاي ماتدفعش رسوم أوبر الأعلى في أوقات الذروة في الإسكندرية

لما عدد الطلبات بيكون أكتر من عدد العربيات إللي في المنطقة ، بتترفع رسوم أوبر علشان تشجّع السائقين إنهم ياخدوا الطلبات دي.. لكن، ممكن ماتدفعش زيادة على الأجرة اللي متعوّد تدفعها لو مشيت على النصايح اللي هنقولها لك.

افهم إيه هي “أوقات الذروة”!

أحيانًا بيتم تطبيق رسوم أوقات الذروة في أوقات معينة زي فترة الأعياد أو الأجازات أو لو الدنيا مطّرت أو لمّا يخرج العملاء كلهم في وقت واحد من سينما مول سان ستيفانو بالليل مثلًا، وكتير منهم يطلب أوبر، بمعنى آخر لما عدد الطلبات بيزيد جدًا عن المعتاد. وبمجرّد ما بيقل ضغط الطلبات، بترجع تسعيرة أوبر لقيمتها الطبيعية.

خطّط كويس

دلوقتي إنت عرفت إزاي بيتم تطبيق رسوم أوبر أوقات الذروة، علشان كده لازم تاخد بالك وتخطط قبلها كويس. يعني ممكن تمشي من المطعم اللي بتتعشّى فيه قبل ما يقفل بنصف ساعة مثلًا، ده لو ماكانش فاتح ٢٤ ساعة، أو تستنى شوية لما تخفّ الزحمة وتبدأ تطلب أوبر.

تابع تطبيقك على طول!

رسوم أوبر أوقات الذروة عادة مابتكونش عالية أوي. لكن، لو عايز تروح مشوارك بأحسن سعر، تابع دايمًا متوسط أسعار رسوم أوبر على التطبيق الإلكتروني، بكده هتوفّر مبلغ كويس!

استنى شوية

في أوقات الذروة، لو قدرت تستنى ولو لخمس دقائق، هتلاقي فرق كبير والأسعار هترجع لمعدّلها الطبيعي؛ لو كانت بتمطر، روح أي كافيه واقعد شوية لحد ما الأسعار تقل تاني. وفي كل الأحوال، تابع دايمًا متوسط أسعار رسوم أوبر على التطبيق الإلكتروني، لغاية ما الأسعار ترجع تاني لطبيعتها.

اتمشّى

أحسن طريقة تتغلب بيها على رسوم أوبر العالية أوقات الذروة إنك تتمشّى بعيد عن المنطقة اللي إنت فيها دلوقتي؛ لو كانت الزحمة على الكورنيش مثلًا والأجرة هناك عالية، هتلاقي رسوم أوبر بتقل لمعدّلاتها الطبيعية على بُعد مسافة مش بعيدة من المنطقة دي. علشان كده، ممكن تستعين بتطبيق أوبر وتجرّب بعض الخيارات التانية، وتروح مباشرة لمكان جديد تستنى فيه عربية أوبر بأحسن سعر.

قسّم مشوارك

ممكن كمان تقسّم مشوارك على مرتين مثلًا؛ يعني تاخد أوبر لنصف المسافة وبعدين تطلب عربية أوبر تانية من هناك تودّيك للمكان اللي كنت عايز تروحه من الأول. طبعًا ممكن أوي تدفع أكتر شوية من رسوم أوبر اللي متعوّد تدفعها في مشوارك ده، بس في النهاية هتوفّر أكتر من الأجرة اللي كنت هتدفعها مع أوقات الذروة!

شارك مع راكب تاني

ممكن تشترك مع راكب تاني وتاخدوا أوبر مع بعض. في النهاية، هيقسّم التطبيق الأجرة عليكم إنتم الاتنين، وهيحاسب كل واحد فيكم لوحده. مستني إيه؟ كل اللي بتدوّر عليه دلوقتي صاحب يركب معاك!

عرّف أصحابك على أوبر

لو عندك صاحب ماستخدمش أوبر قبل كده، دي فرصتك إنك تستفيد إنت وهو؛ عرّف صاحبك على خدمة أوبر، ساعتها هياخد كل واحد فيكم مشوار مجاني من أوبر!